წყლის დიეტა ბოლო წლებში საკმაოდ პოპულარული გახდა და მას თვლიან წონის სწრაფი დაკლების საშუალებად. ასევე, არის მოსაზრება, რომ ჯანმრთელობისთვისაც სასარგებლოა.
ეს მიდგომა ფოკუსირებულია წყლის დიდი რაოდენობით მოხმარებაზე, რაც ორგანიზმიდან ტოქსინების განდევნას უწყობს ხელს და ასევე, ხელს უწყობს მადის შემცირებას.
ამ სტატიაში განვიხილავთ წყლის დიეტის პოტენციურ დადებით და უარყოფით მხარეებს, გეგმის მაგალითს და ზოგადად, თუ როგორია ამ ტიპის დიეტა.
რა არის წყლის დიეტა
წყლის დიეტა, იგივე წყლის მარხვა არის დიეტის სახეობა, რომლის დროსაც ხდება მხოლოდ წყლის მოხმარება გარკვეული პერიოდის განმავლობაში. როგორც წესი, ეს პერიოდი გრძელდება 24-დან 72 საათამდე.
კონცეფცია მარტივია: თქვენ სვამთ დიდი რაოდენობით წყალს მთელი დღის განმავლობაში, ხოლო თავს იკავებთ ყველანაირი საკვებისა და სხვა სასმლისგან. ზოგი ვარიაცია იძლევა გარკვეული სითხეების შეზღუდული მოხმარების საშუალებას, როგორიცაა მცენარეული ჩაი.
ეს მიდგომა ქმნის მნიშვნელოვან კალორიულ დეფიციტს, რადგან თქვენ არ მოიხმართ საკვებს, რაც ბუნებრივად იწვევს წონის დაკლებას. გაზრდილი წყლის მიღება ასევე ხელს უწყობს ორგანიზმიდან ტოქსინების გამოდევნას.
დამატებით, როდესაც ცივ წყალს სვამთ, სხეული წვავს დამატებით კალორიებს, რათა წყლის ტემპერატურა სხეულის ტემპერატურამდე აიწიოს, რაც პოტენციურად ზრდის მეტაბოლიზმს.
რა თქმა უნდა, ეს დიეტა უნდა გაგრძელდეს ძალიან ცოტა ხანი და არავითარ შემთხვევაში არ უნდა მოხდეს მისი დაცვა პროფესიონალის კონსულტაციის გარეშე.
კალორიების რაოდენობა
გაიგე, თუ რამდენი კალორიის მიღება არის საჭირო ყოველდღიურად.
დადებითი და უარყოფითი მხარეები
სხვა დიეტების მსგავსად, წყლის დიეტასაც აქვს დადებითი და უარყოფითი მხარეები. განსაკუთრებული ყურადღება უნდა მიაქციოთ რისკებს, რომლის გამოწვევაც კვების ამ რეჟიმს შეუძლია.
წყლის მარხვამ შეიძლება ხელი შეუწყოს ავტოფაგიას – პროცესი, რომლის დროსაც ხდება ძველ ან დაზიანებული უჯრედული კომპონენტების გადამუშავება.
ეს ბუნებრივი “წმენდის” პროცესი დაკავშირებულია ანთების შემცირებასთან, უჯრედების ჯანმრთელობის გაუმჯობესებასთან და გარკვეული ქრონიკული დაავადებების პოტენციურად შემცირებულ რისკთან.
ამ დიეტას მიმართავენ წონაში დასაკლებადაც, რაც ბუნებრივია კალორიების შეზღუდვის გამო. თუმცა, მნიშვნელოვანია აღინიშნოს, რომ დიეტის შეწყვეტის შემდეგ ისევ იწყება წონაში მომატება.
რაც შეეხება გვერდით მოვლენებს, წყლის დიეტის დროს ძალიან ხშირია ორთოსტაზური ჰიპოტენზია – არტერიული წნევის უეცარი ვარდნა ფეხზე წამოდგომისას, რამაც შეიძლება გამოიწვიოს თავბრუსხვევა და სისუსტე.
რადგან წყლის 20-30% ვიღებთ საკვებიდან, თუ საკმარისი წყალი არ დალიეთ ამ დიეტის დროს, რამდენად გასაკვირიც არ უნდა იყოს, შეიძლება გამოიწვიოს დეჰიდრატაცია.
სარგებელი
- წონის დროებითი კლება
- უჯრედების გაწმენდა
- დეტოქსიკაცია
- არტერიული წნევის შემცირება
რისკები
- ორთოსტაზური ჰიპოტენზია
- კუნთის მასის დაკარგვა
- თავის ტკივილი და გულისრევა
- დეჰიდრატაცია
აღსანიშნავია, რომ ამ დიეტისგან თავი უნდა შეიკავონ ორსულმა ქალებმა, მეძუძურმა დედებმა, ტიპი I დიაბეტის და კვებითი დარღვევების მქონე პირებმა. ასევე, არ არის რეკომენდებული ბავშვებში, მოზარდებში და 70 წელს გადაცილებულ ადამიანებში.
წყლის დიეტის ვარიანტები
არსებობს წყლის დიეტის რამდენიმე ვერსია, რომელიც ითვალისწინებს საკვების და სხვა ტიპის სითხეების მიღებას. ყველაზე გავრცელებული ვარიაციაა წყლის მოდიფიცირებული დიეტა, რომელიც უფრო დიდხანს შეიძლება გაგრძელდეს.
კიდევ ერთი პოპულარული ვარიაციაა სტრუქტურირებული წყლის დიეტა, რომელიც მიჰყვება კვების კონკრეტულ გეგმას და წყლის სმა ხდება ჭამამდე და სხვადასხვა კვებას შორის. ამ დროს ხდება დღეში 2-3 ლიტრი წყლის დალევა.
ასევე არსებობს არომატიზებული წყლის დიეტა, რომლის დროსაც წყლის გარდა ხდება წყლის დიდი ოდენობით შემცველი საკვების მიღება – კიტრი, საზამთრო და სხვ. გასათვალისწინებელია, რომ ცალკე არსებობს კიტრის დიეტა.
ქვემოთ მოცემულია მოდიფიცირებული წყლის დიეტის შვიდდღიანი გეგმის მაგალითის ცხრილი.
| დღე | საუზმე | სადილი | ვახშამი |
|---|---|---|---|
| I დღე | 2 ჭიქა ფორთოხლის წვენი | 3 ჭიქა წყალი | ბოსტნეულის წვნიანი და 2 ჭიქა წყალი |
| II დღე | 1 მოხარშული კვერცხი და 2 ჭიქა წყალი | შერეული სალათა და 2 ჭიქა წყალი | 1 ჭიქა მარწყვის წვენი და მოხარშული სტაფილო |
| III დღე | 6 მარწყვი და 2 ჭიქა წყალი | ბოსტნეული სალათა და 2 ჭიქა წყალი | 1 ჭიქა ტომატის წვენი და მოხარშული ბროკოლი |
| IV დღე | 1 ვაშლი და 2 ჭიქა წყალი | 1 ჭიქა რძე და 2 ჭიქა წყალი | 1 ვაშლი, მოხარშული გოგრა, 2 ჭიქა წყალი |
| V დღე | მოხარშული ნიახური და 2 ჭიქა წყალი | მოხარშული პრასი და 2 ჭიქა წყალი | ერთი ბანანი, მოხარშული ისპანახი, წყალი |
| VI დღე | მოხარშული ქათამი და 2 ჭიქა წყალი | მოხარშული ყავისფერი ბრინჯი და 2 ჭიქა წყალი | ლიმონიანი წყალი და სალათა |
| VII დღე | 1 ჭიქა ფორთოხლის წვენი | მოხარშული ყავისფერი ბრინჯი, სალათა, 2 ჭიქა წყალი | მცენარეული ჩაი, სალათა და წყალი |
შეჯამება
ასე, რომ წყლის დიეტა შეიძლება დაგეხმაროთ წონის დროებით კლებაში და აქვს დეტოქსაციის უნარი. თუმცა, ის დაკავშირებულია რამდენიმე სერიოზულ რისკთან და მისი დაცვა დიეტოლოგთან კონსულტაციის გარეშე არ შეიძლება.
