კუსკუსი: არომატული აფრიკული დელიკატესი

კუსკუსი არის ძალიან არომატული საკვები, რომელიც გამოიყენება მრავალ კერძში და სალათებში და მას სხვადასხვა დადებითი თვისება გააჩნია ჯანმრთელობისთვის.

ამ სტატიაში ვისაუბრებთ მის სახეობებზე, დადებით და უარყოფით მხარეებზე და ასევე, როგორ შეიძლება მისი გამოყენება.

რა არის კუსკუსი

კუსკუსი არის მარცვლოვანი საკვები, რომელიც მზადდება მაგარი ხორბლის სემოლინასგან. მას აქვს ყვითელი შეფერილობა, თხილის მაგვარი არომატი და მსუბუქი ტექსტურა.

მისი ისტორია XIII-XIV საუკუნიდან მოდის და ჩრდილოეთ აფრიკის სამზარეულოს ძირითადი ნაწილია. ასევე, ხშირად გამოიყენება ხმელთაშუა ზღვის დიეტაში.

ტრადიციულად კუსკუსი ხელით მზადდებოდა, დატენიანებული სემოლინას ხორბლისგან, თუმცა დღეს გვხვდება წინასწარ მოხარშულ და გამხმარ ფორმაში.

კუსკუსის ტიპები

არსებობს კუსკუსის რამდენიმე სახეობა, რომლებსაც აქვთ უნიკალური მახასიათებლები, არომატი და მომზადების წესი. ის იყოფა როგორც ქვეყნის, ასევე, ტიპის მიხედვით.

• მაროკოული კუსკუსი: ყველაზე გავრცელებული ტიპი და ფართოდ მოიხმარება ჩრდილოეთ აფრიკაში. წვრილი გრანულები, რომლებიც სწრაფად იხარშება და აქვს ფუმფულა ტექსტურა. გამოიყენება ჩაშუშულ და შემწვარ ხორცთან.
• მარგალიტის კუსკუსი: ასევე ცნობილია როგორც ისრაელის კუსკუსი. აქვს უფრო დიდი მარცვლები და განსხვავებული ტექსტურა. ხშირად შეგხვდებათ სალათების რეცეპტებში.
• ლიბანური კუსკუსი: უფრო დიდი მარცვლები ვიდრე მარგალიტის კუსკუსს და თხილის მაგვარი არომატი. მისი დიდი ზომა და მკვრივი ტექსტურა შესანიშნავს ხდის მას ცხელი თუ ცივი კერძებისთვის.
• ტუნისური კუსკუსი: ასევე ცნობილია როგორც გიგანტური კუსკუსი, რადგან აქვს დიდი და სქელი მარცვლები. ჯიში უფრო დიდი და სქელია, ვიდრე ტრადიციული კუსკუსი. მას აქვს საღეჭი ტექსტურა და ხშირად გამოიყენება ღუმელში გამოსაცხობ და წვნიან კერძებში.
• მთლიანი ხორბლის კუსკუსი: ეს ვარიაცია მზადდება ბულგური ხორბლისგან. აქვს უხეში ტექსტურა და უფრო ნოყიერი არომატი ტრადიციულ კუსკუსთან შედარებით. მას ხშირად იყენებენ ახლო აღმოსავლეთის სამზარეულოში.

შემადგენლობა

კუსკუსი საკმაოდ მდიდარია სხვადასხვა საკვები ნივთიერებებით და ხშირად ურჩევენ წონაში კლებისთვის. თუმცა, მისი კვებითი ღირებულება განსხვავდება ტიპის და მომზადების წესის მიხედვით.

პირველ რიგში, კუსკუსი შეიცავს სელენს – ანტიოქსიდანტი, რომელიც ორგანიზმს ეხმარება დაზიანებული უჯრედების აღდგენაში. 1 ჭიქა კუსკუსი დაახლოებით 150 გრამ სელენს შეიცავს.

გარდა ამისა, მასში არის ნახშირწყლები, ცილები, კალორია, უჯრედისი, ფოსფორი, ვიტამინი B3 და სხვა საჭირო ნივთიერებები.

სასარგებლო თვისებები და რისკები

კუსკუსს მრავალი სარგებლის მოტანა შეუძლია ჯანმრთელობისთვის, რაც მას შესანიშნავ დანამატად აქცევს. თუმცა, შესაძლოა ზოგი ადამიანისთვის ის არ იყოს სასარგებლო.

ამიტომ, მნიშვნელოვანია იცოდეთ თუ რა სარგებელი აქვს მას და რა უნდა გაითვალისწინოთ კუსკუსის მიღებამდე.

სასარგებლო თვისებები:

• მდიდარია რთული ნახშირწყლებით: ის არის რთული ნახშირწყლების კარგი წყარო, რაც სხეულისთვის ენერგიის ძირითადი წყაროა.
• შეიცავს პროტეინს: კუსკუსი შეიცავს ცილების ზომიერ რაოდენობას, რაც აუცილებელია კუნთების აღდგენისთვის და ზრდისთვის.
• დაბალი ცხიმის შემცველობა: კუსკუსი ბუნებრივად დაბალია ცხიმის შემცველობით და არ შეიცავს ქოლესტერინს, რაც სასარგებლოა გულის ჯანმრთელობისთვის.
• ბოჭკოს კარგი წყარო: ის უზრუნველყოფს დიეტური ბოჭკოს საკმარის რაოდენობას, რაც საჭიროა საჭმლის მომნელებელი სისტემისთვის და ხელს უშლის ყაბზობას.
• აძლიერებს იმუნიტეტს: სელენის შემცველობა სასარგებლოა იმუნური სისტემისთვის. ეს ანტიოქსიდანტი ხელს უწყობს ანთების შემცირებას და აძლიერებს იმუნიტეტს ოქსიდაციური სტრესის შემცირებით.

რისკები:

• გლუტენის შემცველობა: ვინაიდან კუსკუსი მზადდება სემოლინას ფქვილისგან, ის შეიცავს გლუტენს. ეს ზღუდავს მათ, ვისაც გლუტენზე ალერგია ან შეუწყნარებლობა აქვს.
• შაქრის დონე: კუსკუსი შეიცავს დიდი რაოდენობით ნახშირწყლებს. ვისაც დიაბეტი აქვს, უნდა მოერიდოს ნახშირწყლებით მდიდარ საკვებს და არ მირთვას დიდი რაოდენობით კუსკუსი.

კუსკუსი გასახდომად

თუ რამდენად გამოდგება კუსკუსი გასახდომად, დამოკიდებულია სხვადასხვა ფაქტორებზე – როგორია თქვენი კვების გეგმა, იცავთ თუ არა რამე დიეტას და ა.შ.

რა თქმა უნდა, მხოლოდ კუსკუსი წონაში დასაკლებად არ იმუშავებს, თუმცა მისი ჩართვა სხვადასხვა კერძში ან დიეტის დროს, დადებითად იმოქმედებს.

რადგან ის შეიცავს ბოჭკოს, ხელს უწყობს საჭმლის მონელებას. ამან შეიძლება გამოიწვიოს სისავსის შეგრძნება და ზედმეტი ჭამისგან თავის არიდება, რაც ხელს შეუშლის წონაში მომატებას.

რაც შეეხება იმას, თუ რისი მომზადება შეიძლება კუსკუსით, არჩევანი მრავალფეროვანია. შეგიძლიათ მოამზადოთ კუსკუსის სალათა ან კუსკუსის სუპი.

ასევე, ის შეგიძლიათ შეურიოთ ნებისმიერ კერძში, რაც უფრო არომატულს და განსხვავებულს გახდის ნებისმიერ საჭმელს.

შეჯამება

ასე, რომ კუსკუსი არის არომატული და ძალიან სასარგებლო საკვები, რომელიც დანამატის სახით შეიძლება შეურიოთ სხვადასხვა საჭმელში. მისი ტიპები განსხვავდება ტექსტურით, გემოთი და სასარგებლოა ადამიანის ჯანმრთელობისთვის.